inda quedemos para alhá l sbarrulho de ls molinos i la fin de ls molineiros, cuntinemos apuis l apagar de las candelas, demos-le la reforma al sacho i a la fouce i apuis de todo esso quedou menos nuosso l nuosso mundo, porque mais armano als outros que se técen por ende afuora: mas nessa mudança nun podemos perder todo i deixar que até la lhéngua se mos calhe; houbo un tiempo an que la fumus deixando ir, calhados, sien fuorças para aguantar l arrebentar de la bida, esses tiempos an que, an poucos anhos, salimos de la quaije Eidade Média pa la Modernidade: talbeç la necidade de tratar de la barriga mos tenga çtraído an relaçon a eilha i agora custa-mos mais a tornar al para trás; mas nada desso mos puode lhebar a zistir na lhuita contra ls nuossos própios uocos, contra las nuossas própias scuolhas; estes son ls dies de la lhéngua i hai ua guerra que inda nun stá perdida, anque yá an tanta batalha derrotados.