Nun deixes de ber l bário mundo

Quando bou por esse mundo afuora, siempre m’ampressiónan sous modos bários, sue bida para alhá de l que manginar podira, i la giente, tanta giente defrente que inche las rues. Hai eiqui ua rue – la Calle Florida – adonde se diç que alhá passa un milhon de pessonas por die, mas onte passei tamien por alhá, de modo que fúrun un milhon i ua pessonas. Son todas defrentes essas pessonas, síguen an frente, nun sei para adonde, mas síguen cumo se fuorças ambisibles las puxáran. Son las fuorças de la bida que las ampúrran, de bidas defrentes tamien, feitas de tantos mundos que eilhi cáben todos. Parei a ua squina por un cachico i ampecei a ber todo cumo un formigueiro sien fin, cada pessona cun sou çubiaco na boca, ls uolhos perdidos, risas nuas i rostros duros noutras, i un bruído de fondo oupindo se cumo un riu apuis ua mundiada. Ye defrente este formigueiro, puis chube por arrascacielos, an beç de abaixar por buraquitos na tierra. Puode parecer stranho, mas muita beç mais gusto de ber giente que menumientos, anque guapos, an piedra.

Quando benie ne l abion, dou me para reler, nun sei yá por quantas bezes l fago, la «Carta subre la felcidade», de Eipicuro, i l «De la bida feliç», de Séneca. Al mirar todo aquel formigueiro de giente, dei cumigo a pensar se alguien dessa giente yá habie lido algun desses lhibricos, i pula cierta que solo alguns los haberan lido. Preguntei-me: se aqueilhes dous filósofos stubíran nesta squina haberien falado de la felcidade cumo falórun? Esta giente poderá ser feliç ou nó andependentemiente de ler esses ou outros lhibros subre la felcidade. Ua tie, dua gordura amalinada, na squina cuntraira a la mie, cun ua rapazica al cuolho, stá sentada ne l suolo de la rue a pedir «un peso para la niña». Por eilha bi passar miles de pessonas sien que naide mirasse para eilha. La nina drume arrolhada por todo l bruído daquel riu de giente. An que sonhará? Faç sentido para eilha la palabra felcidade? Cuido que si fazerá, que la felcidade ten tantas caras cumo pessonas hai ne l mundo. La berdade ye que las pessonas ralamente pénsan an felcidade, mas an cousas mais hounestas, mais simples, como un regoixo de pan, fazer pula bida, çcanso, ancuntrar alguien, ler un lhibrico, recebir un peso de smola, chegar a un cierto sítio, i por ende afuora. La felcidade ye cousa de filósofos i a eilhes habie de ser deixada, talbeç porque l mais de las bezes nun séian felizes, i mesmo als poetas habie de ser proibido amentar an felcidade, que nun fura la deilhes mesmos, yá que outra nun eisiste i esso puode ser ua fuonte de anfelcidade.

Al ber tan bário l mundo, siempre dá para cuncluires que nunca será possible ouneficá-lo, nien cuidares que tou pensar puode ser melhor que l de ls outros, ou que lo puodes demudar. I assi se amostra cumo uns sfergantes ancostado a la Calle Florida puode ser un bun sítio para filosofar i para chegar mais loinje do que ler Eipicuro ou Séneca. Sintes que nun puode haber outra atitude delantre l mundo que nun seia la houmildade, an que l nuosso mundo ye tan pequeinho que nunca cabe neste mundo bário i grande, puis bai sempre mais alhá: nun se sóman estes pequeinhos mundos, nien se déixan reduzir uns als outros, i essa ye la berdadeira fuonte de l respeito que de ti puoda nacer: bibe i deixa bibir, sempre dixe, puis naide puode bibir cumo se mais naide eisistira ne l mundo.

Hoije, nesta crónica, dou me parqui, mas la culpa ye de Eipicuro i de Séneca, i de l formigueiro de giente na Calle Florida de Buonos Aires. Diç Eipicuro al ampeço de la sue Carta subre la Felcidade: «Anque séiamos moços, nun debemos tener miedo de filosofar. I nien sequira na belheç mos hemos de cansar de la filosofie.». Por mi, digo que puode bundar que un s’ancoste a la squina dua rue a ber l formigueiro de giente que passa, ou seguir rue afuora cumo todos ls outros, de uolhos i cabeça bien abiertos a todo l que bei i a quien passa ou stá solo sentado ne l suolo a pedir. L problema stá an que, l mais las bezes, negamos l mundo bário, ancapazes de ber alhá de nós. La filosofie ampeça ne l uolhos, i nas preguntas de spanto que mos éntran por eilhes adrento, i nunca ne l pensar. Se assi nun fur, mui loinje de la bida i de l(s) mundo(s) andará essa filosofie, i esso ye de las cousas mais peligrosas que puode haber.

Buonos Aires, 5 de dezembre de 2012