Staba sola la Praça de Maio

 

Cuntinei miu passeio pulas rues de Buonos Aires, zbiando me daquel mar de giente, anchindo l miu silenço de comentairos, de notas, de lhembráncias, de risas que nun se me chegában a assomar, al dar cumigo a manginar toda aqueilha giente a beilar l tango pulas rues sien carros! La calor apertaba cada beç mais i l lhado de la selombra bien s’agradecie. Ls eidefícios éran cada beç mais grandiosos i cuido, pensei alhá cumigo, que han de ir a dar a algo de amportante, tal i qual cumo ls bários diuses gustában de tener morada acerca de Júpiter, i cumo hai uns anhos bi na San Petersburgo, adonde ls palácios de l’Abenida Nevsky  éran tanto mais grandiosos quanto mais acerca stában de l Palácio d’Ambierno, l de ls czares.

Al fin due rue, alhá staba eilha, la Praça de Maio, praça 25 de Maio cunsante las placas. Tenie na mie cabeça l’eideia de que eilhi era l centro i l coraçon de Buonos Aires, tanta beç oubi falar nessa praça, que para mi se tornou quaijeque mítica. Anton ye eiqui la Praça de Maio! Fui andando debagarico, calhado cumo la missa, a ber se inda s’oubie la boç de Evita Perón, de las jinelas de l Palácio Rosado, sede de l governo, a falá le als «çcamisados», cun sue boç, sues lhágrimas i sou populismo que cortaba cumo faca, na figura fuorte i guapa de Madona a cantar l einesquecible tema «Nun chores por mi Argentina!…». Mas nó, yá nun se oubie Evita Perón, nien sequiera la figura de Cristina Kirschener (atual Persidenta) s’assomaba a algue jinela, que há de tener algo mais que fazer.

Segui pula Praça de Maio fuora, manginando de que sítio de la praça Maradona há de haber feito l sou çcurso a un mar de giente que lo speraba apuis de bolber cula copa de l mundo na mano, an 1986. Inda quije scuitar ls gritos dua nacion zasperada i houmildada de sue grandeza perdida, mas chena de proua nesse die. Yá naide se houbie, nien se sentien las lhágrimas a scorrir puls rostros daquel juntouro sien fin, a festear las únicas guerras que ls probes ou pequeinhos puoden hoije ganhar, andrento un campo de la bola.

Corrie un airico benido de l Mar del Plata, que atamaba todo aquel suberrolho de las dues de la tarde i sabie pula bida. Sentado nun puial, fui correndo culs uolhos todos aqueilhes palácios, de l governo, de l Banco de la Nación i de outros bancos, de l Cabido, dua Buonos Aires oupolenta de ls ampeços de l seclo XX, quando ls eimigrantes al zambarcar fazien un riu mais ancho que l Riu de la Plata, muitos deilhes de las tierras de Miranda, cumo bien relata Carlos Alves, i de que todos coincemos muitos eisemplos, tantos que talbeç nun haba un solo mirandés que nun tenga un pariente an Buonos Aires, seia el mais cercano ou mais fastado. Agora, todos aqueilhes palácios parécen scaletos de pantasmas i até l palácio de l governo ten ua quelor que ye mais de sangre que rosada. Staba sola la Praça de Maio i to la giente que passaba nien daba por eilha!

Fui sentado nesse puial de la Praça de Maio que ampecei a oubir ls gritos i senti las lhágrimas. Solo you sentie i oubie, de uolhos cerrados, que todo alredror staba calhado. Éran las abós i las mais de la Praça de Maio, que inda hoije se cuntínan a ajuntar alhá todas las quintas. Sues lhágrimas i sous gritos nunca se han de calhar, nien ls crimes de la ditadura de Videla i de outros generales argentinos deixará de retumbar acontra las paredes daqueilhes palácios i de ancarrapitar por sues quelunes griegas de cantarie. Albantei me, que era mui custoso quedar eilhi mais tiempo. Talbeç inda alhá torne, para sentir la soledade de la Praça de Maio. Si, talbeç na quinta que ben, que son outras las lhágrimas quando bemos ls uolhos que las bótan, son outros ls gritos quando bemos abrir se la boca de adonde sálen.

Buonos Aires, 4 de dezembre de 2012