Nun ten çcanso San Spedito.

 

Passaba yá de las onze de la manhana quando l abion de la cumpanhie GOL aterrou ne l Aeroparque de Buonos Aires, apuis de mais de doze horas de biaije zde Lisboa, por San Paulo, an bolo de la TAP, ampeçado inda ne l trés de dezembre. Apuis de passar al lhado un bárrio de lata de muitos quilontros d’outrostrada, alhá aparecírun ls arrascielos de l centro de la cidade. Apuis de todo arrimar ne l hotel i un bun banho, botei me pulas rues, ancarando ua calor de trinta degraus, que eiqui l berano stá a la puorta. La biaje si fui cansatible, mas tenie gana de zamburrar las pantorrielhas. Acabo de chegar de trés horas a bagamundar pul centro de Buonos Aires i solo agora paro para para screbir, que ls pies deloridos píden çcanso.

A cada squina, la cidade inda apersenta bien bibas las marcas de sue riqueza de fins de l seclo XIX i ampeços de l seclo XX, cun sous palácios pesados, aan cantarie, de fruntales cun quelunas griegas a cantar ua glória que l dinheiro sempre quijo para el, mas que nunca fui capaç de guardar nien de antender. Sali de las modernas abenidas, adonde ls carros mal cáben, i meti pulas rues solo para pessonas, streitas i perpendiculares uas a las outras, rasgadas a ampeços de l seclo atrasado. Giente, giente, giente sien parar, muita giente nuoba, muita giente guapa. Fui un passeio an silenço, sien mapa, sien çtinos defenidos, anque sabisse que l eissencial de l que you querie ber staba por eilhi, mais quadra menos quadra.

Apuis de muito andar, l purmeiro eidefício adonde antrei fui la Catedral, de ampeços de seclo XIX, nua squina arrodiada de prédios mais altos, de modo que mal se bie. Ua cousa por mi nunca bista, aquestumado a que la catedral dua cidade oucidental siempre subirta a todos ls prédios i se beia al loinje. Mas ls prédios al lhado son de bancos, i San Denheiro nun faç la cousa por menos, i quier sues eigreijas mais grandes, mais ricas, i sous altares sparbados por todos ls lhados de modo que nanhun outro dius se le acumpare. La Catedral ye barroca, pesada de dourados i bóbedas, mas nun apersenta nada de special. Fúrun subretodo algues eimaijes que me chamórun l’atencion, trés na special: un Cristo yá purparado para ser curceficado, znudo, sentado i cula mano ne l queixo de spanto, nua atitude serena de pensador, cumo quien diç, cumo ye que you me fui a meter nua ancreca destas! anquanto dous homes de ls sous cinquenta anhos delantre rezában de zinolhos cun to l atento; apuis, un santo curceficado nua cruç de Santos Andrés, mas arreparei que era outro l santo, anque la cruç fura mesmo de Santo Andrés [eiqui lembrei me de Alcides i de la sbarrulhada capielha de Santo Andrés an Cércio]; mas l santo mais stroudinairo staba a l’antrada la puorta de la catedral, cun muitas belas a arder delantre i l que me chamou subretodo l’atencion fui ua rapaza inda nuoba i mui guapa, a rezar delantre del, de pies, de uolhos cerrados i mui cumpenetrada. Quedei a mirar un cacho. Apuis, acheguei me a muntonico de papelicos delantre de l santo i bi que se trataba de SAN SPEDITO, ende antendendo la debocion de la rapaza!… Diç assi la ouracion de San Spedito [Expedito, an spanhol], que staba ne l tal papelico:

Á glorioso SAN SPEDITO de las causas justas i Ourgentes. Ajuda mos nestas horas de agonie i de zaspero. Pide le por nós al SENHOR JASUS CRISTO. Tu que sós un Santo Guerreiro [l caramonico si ten ua spada!], tu que sós l Santo de ls Zasperados, tu que sós l Santo de las CAUSAS OURGENTES, tu que paras a quien mos quier fazer mal, ajuda me, dá me fuorças, coraije i sereno. Porteije a la mie familha cumo l fazes cula mocidade, ls amalinados, l trabalho, ls negócios i ls tribunales. ATENDE L MIU PEDIDO………………… Atende lo cun ourgença, por fabor trai me outra beç la paç. Hei de te ser fiel pa l restro de la mie bida i hei de dar a coincer l tou nome a todos ls que ténen FÉ.

Sali de la catedral i cuntinei pulas rues, chenas de giente, a pensar ne l zaspero houmano i an cumo esse san Spedito há de ser un santo cheno de trabalho. Stá eilhi l fin de la lhinha, yá nun hai mais naide a quien recorrer i se l caramonico nunca poderá fazer milagres, puis solo nós podemos fazer milagres por nós mesmos. Nun ten pátria l delor i l zaspero houmano, mas an todo l lhado ls diuses son xordos, delores i diuses armanos an todo l lhado, tal i qual cumo las modernas cidades.

Buonos Aires, 4 de dezembre de 2012