Agosto 2011


tamien las férias se acában, esse modo que ambentemos de mos cansar an outras cousas, deixando algo de lhado l reloijo i ls caminos dun anho anteiro.

ye cada cachico l redadeiro
i quieres-lo prender,
cunciente de que nun bolberá:
solo por esso, recibe
un assopro d’eiternidade,
essa que nunca bai alhá de ti,
inda que screbido puis eiqui
tou yá nun será.

até l rugido de aire ne ls galhos parece que ben de loinge: tamien eilhes talbeç ressónhen.

nas férias questumo perder la gana de screbir ne ls mius blogues: será porque tamien essa scrita ye trabalho?

recorto bielhos jornales, ourdeno-los por eras i dá-me la risa a las puortas de l tiempo que ls títalos ban abrindo: amarielhos, dun stranho oulor, guárdan horas i nuites, trabalhos, priessas, eideias, palabras, palabras… son pedamiegos de la mimória, ye berdade, mas bálen por eilhes mesmos para alhá de mi, para alhá la mancha de palabras, houmildes palabras mirandesas, nomes i mais nomes colgados de palabras que bolórun an suonho: fui esta ua huorta adonde tamien ponimos la lhéngua, agora tamien eilha grabe, anque delorida: un die han de acá benir a apanhar l que le dir la gana puis, anque probe, siempre dá para matar la fale i l Jornal Nordeste ha de siempre ser tenido cumo ua guapa casa de la lhéngua mirandesa, un piquete de adonde muitos fúrun ansaiando sous bolos de scrita até séren capazes de bolar alto cun sues própias alas; que mos amporta se muitos nien sáben que eisiste i outros fázen de cuonta?

ls lhargos amarielhos guárdan
uorfanas, perdidas trilhas
de que yá naide quier saber:
cumo le han de dar balor al pan?

neilhes ampeçaba la bendímia, nua fugida binha abaixo: al fin poucos quemie, balie-me l oulor, que inda hoije me sabe i l busco por mercados anho atrás anho, sien nunca l haber achado.

iba alto l berano i nun cabien n’ambuça ls morcones: era contra l peito znudo que me spetában sou pelo de brugo, dun amarielho ambergonhado al modo para denteira: cumo poderien anton, poner la piel a arder sien que l muito arrascar fura malzina: cuido que bás a tener sarampelo, dixo-me apuis mie mai, i ls morcones yá nien tubírun tiempo de me saber a algo: nun sei an que tiempo fui, mas inda faltaba muito para andar a scuola.

buie an claro cada die
i nunca la gana s’acababa:
l redadeiro cachico sabe melhor.

nunca assossegas,
nunca acabas de bolber a casa:
stá siempre an obras, cumo tu.

son abismos i mostros que binces
todos ls dies i naide dá de cuonta:
ye l heiroísmo esse aguantar calhado,
l nun parar ls passos anque naide
te puoda un çtino cierto apuntar:
nun passa de mais ua palabra,
assi i todo faç-te falta.

cun outras palabras bou scarbando palabras que m’atráien cumo un abismo, siempre an busca dun claro sol: cumo acaba de nacer, nunca la busca acaba, nun ten fin l ancantamiento.