nien tu sabes até que punto te ambenteste,
de l quaije nada te faziste nessa caminada para
stender ls galhos al sol, zbiada de las airaçadas;

nien tu sabes cumo siempre te agarra la debagarosa
traça, mais quanto mais debrebe fuges para
adonde nun chegue l racrac de ls ratos de la lhuç;

nien tu sabes cumo hai quien se cegue al ber
la lhuç solo porque nun sal de l friu sol para adonde
arremánsan selombra, carambelo i agres dies;

nien tu sabes que le has de fazer a esse
silenço cun que bózias ls passos para
apagar l bruido cun te cuorres l riu;

nien tu sabes cumo aguantar l freno nas palabras
i deixar florir las risas fuora de sou tiempo para
que nun te falte oulor a bida neste antierro;

nien tu sabes que de mais amportante puoden
ls dies tener do que amassar mirares culas
manos que fázen fiestas al tiempo, nien tu sabes.

Advertisement