Setembre 2009


ansáian ls páixaros sou retiro,
acénden las fuolhas sue cinta de la bielha,
spértan las nubrinas pulas galázias:
calha-te, deixa-me oubir
l ressonhar de las semientes.

passa na rue an buraco:
ye esse l modo que
ten de sorber l mundo;

quando le chiçquei l nome,
quedou a prumo l die,
a arder an proua,

cumo quien abre
la puorta de casa i l sangre
canta cumo un rigueiro:

las fuolhas de las arbles
míran-te i queda quelor de
risa sou amarielho outonhal.

apuis atireste l mirar, cantada
a capar l aire que traie l tiempo,
siempre punto de apoio a tue palanca;
ye l’aldaba d’outonho que lhebantas
mas solo l branco d’eimbierno entra acontra
l lhume; spertas cedo a chamar l sol,
mas yá nun calece cumo datrás
ls uossos: bés-lo dreito al cielo

i nun puodes pará-lo para un dedo
de cumbersa que seia, un suco por
abrir, ua risa, un bater de pies
ne l suolo pa spantar l formigueiro
de ls anhos; nun amarras la cabeça
i dreito cuntinas pul suonho; apuis

yá se sínten las scuolas pulas rues:
bien beio ls carros, ban a daprender
un modo de nun mos fazéren falta,
atirando sou bruído an abraço
al amarielho de las fuolhas donde
cada beç mais me beio al speilho; bou
a saber donde mana la manhana:
ye sede l que la nuite pon ne ls beiços;

yá muitá que se fúrun las ciguonhas,
ye tiempo de foucins i de semientes,
stan a chegar las purmeiras nubrinas
i cun eilhas la suidade de l sol:
ye mui stranho squecer l que inda tengo,
por suidade ou miedo de l a benir.

assomou-se la purmeira ourbalheira,
choro de setembre pula derrota
de las huortas: na teç de ls sucos ceça
l arrolhar de las semientes, tue mano
yá manolho arrochado pul eimbierno;
quédan las carreiras de berças, tronchos
nua eilusion de Natal, l cuorpo antregue
al adundiar de la carambina.

dás cuntigo a zaprender l borçudo
de ls gromos, i de l berde ye selombra
l que berdega pulas frinchas de
las paredes donde la primabera
se te slúbia; benirá inda tiempo
al son de te naceres nuoba huorta?

nunca se dou de cuonta que l tiempo l lebaba pula mano: agora que l sabe, aperta-le la mano l mais que puode, nua altura an que yá las fuorças se le fúrun i sinte algo – nun quier saber l quei – a slubiar.

quando arde la calor alhá de ls trinta graus,
apágan-se ende ls uolhos até la selombra
chubir pulas paredes, an perdon al sol;
quando ls bózios de berde oupidos mos angúlhen,
hai un amarelhar feito silenço fondo,
nin bido s’acradita, inda la fuorça un hino:
ye l outonho que tinhe ls frisgos de l berano,
yá l brugo de la muorte ruobe l tiempo moço.

hai dies an que tengo mesmo gana de screbir un poema, seia l que esso fur: puis ye quando las palabras mais cústan a salir, inda que me farte de sudar a pari-las; assi i todo, esso ye mui ralo, puis la gana nada ten que ber cun poemas, mas cun screbir: antes, nunca me pregunto ou tremino l que bou a screbir; chegado al fin, quando torno a ler, ye que me dou de cuonta por que caminos andube i toca a limpar l puolo de ls pies, ls pelhiços de l pelo, a remendar ls rasgones de la roupa, a limpar l sudor, a botar fuora l monte que se amuntonou, a sanar algue brecha ou a abaixar algun bolho; todos yá sentimos gana de falar cun alguien, de zabafar, i dízen que esso até faç bien: a screbir nunca dou cumigo a screbir para naide, inda que steia a poner a público l que scribo, assi cumo ua fala boubica que alguien faç cun el mesmo rue abaixo; l modo cumo beio las cousas ye assi: hemos de tener andrento un manadeiro de palabras, que nun sei an que sítio de nós stará i debe de correr para algue fuonte, mas ben ua altura an que yá arrama para fuora i un solo ten que deixar salir las palabras senó pónen-se a boziar i un nunca mais ten paç; l pior ye quando la fuonte queda chena i nun achamos modo de la sangrar para que arrame: ende las palabras checólhan-se i ambarálhan-se uas culas outras, dun modo que nien nós las antendemos quando sálen i nada podemos fazer para que seia doutra maneira: ye essa la hora de l poema, mística i sagrada cumo todo l que nun chegamos a antender.

quedorun-me ls uolhos
ne ls fenascos:
nas fuontes de l silenço
cántan checharas:
nun se calhou inda l berano.