Júnio 2009


lémbran-se-me uas scaleiras i un sol de márcio, amarelhado; l copo de smalte, azul, cheno d’auga de la bica; nun sei porquei, mas sentie la barba a crecer, l barbelhar, assi i todo cun trés anhos, talbeç quatro; todos ls uolhos a ber se buie l’auga – serie auga? – i, apuis, un resfolgar fondo que nun chegou a ser ua risa; todo esso me ben de beç an quando cumo un cinema, cumo se las scaleiras quedássen na frunteira de l mundo i de la bida: assi i todo nunca cheguei a saber al cierto cumo era l tife, a nun ser talbeç essa eideia de frunteira, de sede, de auga de la bica, de reampeço de l mundo: son tan andebles las frunteiras de las cousas, de la bida, que bonda un airico pa las arrepassar.

Advertisements

cumponies l azul de ls uolhos para ua risa mais serena i, na tarchica, colhies la nuite cumo un ramo; quando la redadeira raça de sol te ardiu ne ls beiços, solteste ua palabra que se lhibartou cumo l cuorbo de l’arca de l delúbio: yá nanhun selumbron poderie apegar-te sou tenhido.

faziemos cascatas i guitas cun
bandeiricas de jornal porriba
la rue: de todo quedou l bolar,
la risa sacudida al aire.

deixas correr ls uolhos cumo quien acende un cigarro solo para poder acupar las manos: de l que bés nada registras, de l que oubes nada antendes, ansaias rue abaixo ua manobra de silenço, ye ua jinela que quieres abrir para fuora de l bruído, mas la calor ben-te ampapada de puolo i de fumo de ls altemobles: sentas-te nun scanho de selombra i abres l jornal i nien por un segundo te déixan ls cínfanos de las amboras: naide çcubre un beneno que deia cunta deilhes, que renácen a cada manhana i siempre ateimamos an ls mandar benir pus nun sabemos bibir sien eilhes..

ye neilhas que bota raiç l bolo de las abes, bírgulas retrocidas na scrita bertical de las faias: son arbles cun sou resfolgar suspenso dua grima triste, presas a ua seiba de piedra que le dá bida que bonde para aguantar sou suplício: la sede suspensa cumo ua ouracion, nien las mais fuortes airaçadas le tráien l riu ou l lhagrimar de las faias le lában la casca sieirada de delor, tántalos de l douro que inda búscan l dius que le botou castigo: passórun por eilhas cientos d’anhos i, mais que arbles, son agora la demustraçon filosófica de la possiblidade de ls ampossibles, para mais nua tierra adonde ye possible oubir ua lhéngua que muitos yá cunsidrórun ampossible.

de tan guapas, cada lado puxou pulas arribas de l Douro para quedar el solo cun eilhas i l resultado bei-se bien al caminar pula bena de l’auga de l riu: la paisaige mais guapa de l mundo, que nun hai spina que aguante las quelobrinas nien uolhos que atámen las lágrimas delantre daqueilha bergindade de l mundo que eilhi stá siempre a acabar de nacer.

beniste quando la calor yá ponie nubrina ne l pensar:
assi i todo cousas houbo que quedórun
claricas para siempre.

Próssima Páigina »